July 14, 2017 | By ਸਿੱਖ ਸਿਆਸਤ ਬਿਊਰੋ
ਦਾਰਜੀਲਿੰਗ: ਮੀਡੀਆ ਰਿਪੋਰਟਾਂ ਮੁਤਾਬਕ ਵੱਖਰੇ ਗੋਰਖਾਲੈਂਡ ਦੀ ਮੰਗ ’ਤੇ ਦਾਰਜੀਲਿੰਗ ’ਚ ਚੱਲ ਰਹੇ ਅੰਦੋਲਨ ਦੌਰਾਨ ਕੱਲ੍ਹ (ਵੀਰਵਾਰ) ਪ੍ਰਦਰਸ਼ਨਕਾਰੀਆਂ ਨੇ ਜੀਟੀਏ ਦਫ਼ਤਰ, ਰੇਲਵੇ ਸਟੇਸ਼ਨ ਤੇ ਜੰਗਲਾਤ ਵਿਭਾਗ ਦਾ ਬੰਗਲਾ ਸਾੜ ਦਿੱਤਾ ਤੇ ਕਈ ਗੱਡੀਆਂ ਦੀ ਭੰਨ ਤੋੜ ਕੀਤੀ।

ਦਾਰਜਲਿੰਗ ‘ਚ ਸੈਰ-ਸਪਾਟਾ ਵਿਭਾਗ ਦੇ ਦਫਤਰ ਨੂੰ ਗੋਰਖਾਲੈਂਡ ਸਮਰਥਕਾਂ ਨੇ ਲਾਈ ਅੱਗ
ਪਹਾੜੀ ਇਲਾਕੇ ਵਿੱਚ ਹਿੰਸਾ ਦੇ ਮੱਦੇਨਜ਼ਰ ਦਾਰਜੀਲਿੰਗ, ਕਾਲਿਮਪੌਂਗ ਤੇ ਸੋਨਾਡਾ ’ਚ ਫੌਜ ਤਾਇਨਾਤ ਕੀਤੀ ਗਈ ਹੈ। ਪ੍ਰਦਸ਼ਨਕਾਰੀਆਂ ਨੇ ਨੇਪਾਲੀ ਭਾਸ਼ਾ ਦੇ ਕਵੀ ਭਾਨੂ ਭਗਤ ਆਚਾਰਿਆ ਦੀਆਂ ਕਵਿਤਾਵਾਂ ਗਾਉਂਦਿਆਂ ਰੈਲੀਆਂ ਵੀ ਕੀਤੀਆਂ। ਗੋਰਖਾ ਜਨਮੁਕਤੀ ਮੋਰਚਾ ਅਤੇ ਪਹਾੜੀ ਇਲਾਕੇ ਦੀਆਂ ਹੋਰਨਾਂ ਪਾਰਟੀਆਂ ਨੇ ਵੀਰਵਾਰ ਨੂੰ ਭਾਨੂ ਆਚਾਰਿਆ ਦਾ ਜਨਮ ਦਿਨ ਵੀ ਮਨਾਇਆ। ਇਸੇ ਦੌਰਾਨ ਲੇਖਕ ਕ੍ਰਿਸ਼ਨ ਸਿੰਘ ਮੋਕਤਨ ਤੇ ਗਾਇਕ ਕਰਮ ਯੋਜਨ ਨੇ ਆਪਣੇ ਐਵਾਰਡ ਨੇਪਾਲੀ ਸਾਹਿਤ ਅਕਾਦਮੀ ਨੂੰ ਮੋੜ ਦਿੱਤੇ।

ਦਾਰਜਲਿੰਗ ਰੇਲਵੇ ਸਟੇਸ਼ਨ (ਫਾਈਲ ਫੋਟੋ)
ਅਧਿਕਾਰਤ ਸੂਤਰਾਂ ਨੇ ਦੱਸਿਆ ਕਿ ਪ੍ਰਦਰਸ਼ਨਕਾਰੀਆਂ ਨੇ ਮਾਲ ਰੋਡ ਚੌਕ ਸਥਿਤ ਜੀਟੀਏ ਦੇ ਯਾਤਰਾ ਤੇ ਸੈਰ-ਸਪਾਟਾ ਦਫ਼ਤਰ, ਕਸਰਿਆਂਗ ਦੇ ਗਯਾਂਬਾਰੀ ਇਲਾਕੇ ਦੇ ਰੇਲਵੇ ਸਟੇਸ਼ਨ, ਤੀਸਤਾ ਨਦੀ ਨੇੜਲੇ ਜੰਗਲ ’ਚ ਬਣੇ ਬੰਗਲੇ ਨੂੰ ਸਾੜ ਦਿੱਤਾ ਤੇ ਦਾਰਜੀਲਿੰਗ ’ਚ ਸਰਕਾਰੀ ਗੱਡੀਆਂ ਨੂੰ ਨੁਕਸਾਨ ਪਹੁੰਚਾਇਆ।

ਗੋਰਖਾਲੈਂਡ ਸਮਰਥਕ (ਫਾਈਲ ਫੋਟੋ)
Related Topics: Gorkhaland Struggle, Nepal, West Bengal