April 26, 2017 | By ਸਿੱਖ ਸਿਆਸਤ ਬਿਊਰੋ
ਨਿਊਯਾਰਕ: ਨਿਊਯਾਰਕ ਟਾਈਮਸ ਨੇ ਆਪਣੇ ਸੰਪਾਦਕੀ ‘ਚ ਸਖਤ ਪ੍ਰਤੀਕਿਆ ਕਰਦੇ ਹੋਏ ਕਸ਼ਮੀਰ ‘ਚ ਭਾਰਤੀ ਫੌਜੀ ਅਤੇ ਨੀਮ ਫੌਜੀ ਦਸਤਿਆਂ ਵਲੋਂ ਕੀਤੀ ਜਾ ਰਹੀ ਕਾਰਵਾਈ ਨੂੰ ਜ਼ਾਲਮਾਨਾ ਦੱਸਦੇ ਹੋਏ ਚਿਤਾਵਨੀ ਦਿੱਤੀ ਗਈ ਹੈ ਕਿ ਇਸ ਨਾਲ ਜਵਾਬੀ ਹਿੰਸਾ ਨੂੰ ਵਧਾਵਾ ਮਿਲੇਗਾ। ਸ਼ਨੀਵਾਰ ਨੂੰ ਪ੍ਰਕਾਸ਼ਤ ਇਸ ਸੰਪਾਦਕੀ ‘ਚ ਕਿਹਾ ਗਿਆ ਕਿ ਭਾਰਤ ਦੀ ਸਰਕਾਰ ਨੂੰ ਕਸ਼ਮੀਰ ‘ਚ ਮਨੁੱਖੀ ਅਧਿਕਾਰਾਂ ਦੀ ਸੁਰੱਖਿਆ ਪੱਕੀ ਕਰਨੀ ਚਾਹੀਦੀ ਹੈ।
ਨਿਊਯਾਰਕ ਟਾਈਮਸ ਦੇ ਸੰਪਾਦਕੀ ਬੋਰਡ ਨੇ ਇਹ ਟਿੱਪਣੀਆਂ ਅਜਿਹੇ ਸਮੇਂ ਕੀਤੀਆਂ ਹਨ ਜਦੋਂ ਕੁਝ ਦਿਨ ਪਹਿਲਾਂ ਇਕ ਵੀਡੀਓ ਵਾਇਰਲ ਹੋਇਆ ਸੀ ਜਿਸ ਵਿਚ ਦਿਖ ਰਿਹਾ ਸੀ ਕਿ ਇਕ ਕਸ਼ਮੀਰੀ ਨਾਗਰਿਕ ਨੂੰ ਮਨੁੱਖੀ ਢਾਲ ਬਣਾ ਕੇ ਫੌਜੀ ਗੱਡੀ ਨਾਲ ਬੰਨ੍ਹਿਆ ਗਿਆ ਸੀ।

ਭਾਰਤੀ ਫੌਜ ਵਲੋਂ ਕਸ਼ਮੀਰੀ ਨੌਜਵਾਨ ਨੂੰ ਜੀਪ ਦੇ ਸਾਹਮਣੇ ਬੰਨ੍ਹਿਆ ਗਿਆ
ਸੰਪਾਦਕੀ ‘ਚ ਕਿਹਾ ਗਿਆ ਕਿ ਪਥਰਾਅ ਕਰਨ ਵਾਲੀ ਭੀੜ ਤੋਂ ਬਚਣ ਲਈ ਸ਼ਾਲ ਬੁਣਨ ਵਾਲੇ 24 ਸਾਲਾ ਫਾਰੂਕ ਅਹਿਮਦ ਡਾਰ ਨੂੰ ਮਨੁੱਖੀ ਢਾਲ ਵਾਂਗ ਇਸਤੇਮਾਲ ਕਰਦੇ ਹੋਏ ਜੀਪ ਅੱਗੇ ਬੰਨ੍ਹ ਕੇ ਅਤੇ ਉਸਦੀ ਕੁੱਟਮਾਰ ਕਰਕੇ ਭਾਰਤੀ ਫੌਜੀ ਕਸ਼ਮੀਰ ‘ਚ ਮਨੁੱਖੀ ਅਧਿਕਾਰਾਂ ਦੀ ਉਲੰਘਣਾਂ ਦੇ ਲੰਬੇ ਇਤਿਹਾਸ ‘ਚ ਬਹੁਤ ਹੇਠਾਂ ਡਿਗ ਗਈ ਹੈ। ‘ਕਸ਼ਮੀਰ ‘ਚ ਜ਼ੁਲਮ ਅਤੇ ਬੁਜ਼ਦਿਲੀ’ ਸਿਰਲੇਖ ਨਾਲ ਇਸ ਸੰਪਾਦਕੀ ‘ਚ ਕਿਹਾ ਗਿਆ, “ਸੋਸ਼ਲ ਮੀਡੀਆ ‘ਤੇ ਚੱਲੇ ਇਸ ਵੀਡੀਓ ਨਾਲ ਦੁਨੀਆ ਸਾਹਮਣੇ ਆਈ ਇਸ ਘਟਨਾ ਨਾਲ ਕਸ਼ਮੀਰ ਸੰਕਟ ਦੀ ਡੁੰਘਾਈ ਦਾ ਅੰਦਾਜ਼ਾ ਲਾਇਆ ਜਾ ਸਕਦਾ ਹੈ।”
ਸਬੰਧਤ ਖ਼ਬਰ:
ਭਾਰਤੀ ਫੌਜ ਨੇ ਪੱਥਰਬਾਜ਼ੀ ਤੋਂ ਬਚਣ ਲਈ ਕਸ਼ਮੀਰੀ ਨੌਜਵਾਨਾਂ ਨੂੰ ਜੀਪ ਦੇ ਸਾਹਮਣੇ ਬੰਨ੍ਹਿਆ …
ਸੰਪਾਦਕੀ ‘ਚ ਕਿਹਾ ਗਿਆ ਕਿ ਇਸ ਘਟਨਾ ਤੋਂ ਬਾਅਦ ਭਾਰਤ ਦੇ ਫੌਜ ਮੁਖੀ ਜਨਰਲ ਵਿਪਿਨ ਰਾਵਤ ਨੇ ਡਾਰ ਨੂੰ ਜੀਪ ਨਾਲ ਬੰਨ੍ਹਣ ਵਾਲਿਆਂ ਖਿਲਾਫ ਕਾਰਵਾਈ ਦਾ ਇਰਾਦਾ ਤਾਂ ਜ਼ਾਹਰ ਕੀਤਾ ਪਰ ਨਾਲ ਹੀ ਇਹ ਵੀ ਧਮਕੀ ਦੇ ਦਿੱਤੀ ਕਿ ਕਸ਼ਮੀਰ ‘ਚ ਪੱਥਰਬਾਜ਼ੀ ਕਰਨ ਵਾਲੇ ਨੌਜਵਾਨ ਭਾਵੇਂ ਅੱਜ ਬਚ ਜਾਣ, ਪਰ ਅਸੀਂ ਉਨ੍ਹਾਂ ਨੂੰ ਫੜ੍ਹ ਹੀ ਲਵਾਂਗੇ ਤੇ ਸਖਤ ਕਾਰਵਾਈ ਕਰਾਂਗੇ।
ਸੰਪਾਦਕੀ ‘ਚ ਕਿਹਾ ਗਿਆ ਕਿ “ਇਸ ਸਖਤ ਰਵੱਈਏ ਨਾਲ ਫਸਿਆ ਕਸ਼ਮੀਰ ਅਜਿਹੇ ਸੰਕਟਪੂਰਨ ਵਾ-ਵਰੋਲੇ ‘ਚ ਫਸ ਜਾਏਗਾ ਜਿਸ ਨਾਲ ਹੋਰ ਨਿਰਾਸ਼ਾ ਅਤੇ ਹੋਰ ਹਿੰਸਾ ਦੇਖਣ ਨੂੰ ਮਿਲ ਸਕਦੀ ਹੈ।”
Related Topics: All News Related to Kashmir, New York Times